高雄二二八 Ko-hiông JĪ-JĪ-PAT - 台语绘本 - 作者签名版本
作者： 吴家铭
绘者： 李怡志
出版社：台语传播企业有限公司
出版日期：2020/9
定价：450元
规格：精装 / 66页 / 25.7 x 18.2cm / 普通级 / 全彩印刷 / 初版
出版地：台湾
故事绍介
绘本起头，作者描写台湾人对中华民国ê期待kap失望，话头一下换，讲着台北发生查私薰ê意外，台湾人对政府粒积ê不满随就piak--出-来，冲突liam-mi湠到规台湾。高雄因为有驻军，真紧就有武装镇压。高雄有名有力ê人成立委员会希望kap军方和平来解决，无疑军方无爱参详，颠倒派兵仔分做三路kâng镇压koh-khah忝，致使高雄市民死伤严重，爱河kap西子湾海口hia，hō͘血染做一phiàn红红红。
二二八是台湾现代史--里真要紧ê事件，转型正义ê议题虽然kài严肃，soah是民主素养教育bē用得欠ê一块。Chit十外年来，有讲着白色恐怖议题ê囡仔册市面chió-khoeh，内底mā有一寡有出台语版ê录音，总--是，tī册市强势ê华文环境下底，直接用台语文字呈现，来讲chit段历史ê绘本无几本。作者吴家铭描写二二八事件内底高雄受镇压真伤重ê情形，用台语文重koh呈现，ná像koh-khah ē-tàng感受着hit-chūn紧张ê气氛。
文字ê重koh呈现，本身就有tài想像文化ê积极意义。当初时二二八伤痕ê败害，代先tī-leh政治环境hō͘束缚kah透底，sòa--来koh去影响着台湾人对家己语言、文化ê信心。Bē赴时ê转型正义有济济欠缺，有真济所在值得lán koh去究勘，久年受政治打压ê本土语言就是一个例。用台语文字写二二八ê故事，是对无公义ê政策做双重ê反抗，hō͘读者thang mé醒，uì语言ê角度重kā chit段历史koh khioh来liū。
作者绍介
“ChhoeTaigi台语辞典／字词资料库”、“PhahTaigi台语输入法”ê开发者。
台湾人ài知影家己ê文化历史、高雄人ài了解打狗，是我bat代志了后坚持ê价值观，致使我注心读台湾学，学台文、写台文，台湾人请lín做伙来án-ne做。
作者ê话
Ē写chit本画本故事ê缘故讲--起-来真简单mā真悲哀，因为chín ê学生koh济济人对二二八事件完全无了解，甚至讲是日本人拍台湾人，你就知影“支那”殖民政府ê思想教育偌成功，到taⁿ mā无改变偌济。台湾人ài知影家己ê文化历史、高雄人ài了解打狗，是我bat代志了后坚持ê价值观，致使我注心读台湾学，学台文、写台文，台湾人请lín做伙来án-ne做。Chit个故事kap一般kan-na去讲受害者- -ê无仝，内底有写凶手ê名，想beh提醒逐家，转型正义上要紧- -ê 就是处理加害者kap后壁ê共犯结构。Ē特别用受害者ê语言写chit个历史，mā是我一直想beh hō͘逐家思考--ê，mài koh用加害者ê语言teh讲lán家己ê历史，che对hia-ê受难ê人来讲，根本是一种侮辱，koh一摆kā in凌治。Beh使用白话字，mā是尊重、thn̂g湠lán家己ê文化历史。转型正义上要紧头一层，就是语文ê转型正义，使用lán家己ê母语语文，mài koh用殖民者ê语文，che是上简单每一个人家己就做ē到ê代志。自án-ne，台湾人chiah有可能chiâⁿ做“Tâi-oân-lâng”，ǹg望chit工赶紧来到。
----------
合作洽询：欢迎私讯到“Tâi-gí Niau 台语猫”粉丝专页